ខេត្តកំពត-ដោយ: សុភ័ក្ត្រ
ប្រជាពលរដ្ឋ ១១គ្រួសារបានប្តឹងក្រុមហ៊ុន សុខា អូតែល ថាបានប្រើគ្រឿងចក្រមកឈូសឆាយបំផ្លាញផលដំណាំរបស់ពួកគាត់ (ពលរដ្ឋ១១គ្រួសារ) ដែលកំពុងអាស្រ័យផលនៅលើទីតាំងដីក្នុងភូមិកែបថ្មី ឃុំបឹងទូក ស្រុកទឹកឈូ ខេត្តកំពត។ ប្រជាពលរដ្ឋដែលបានរងផលប៉ះពាល់ រួមមានៈ ១-លោក កែប មុនីវណ្ណ, ២-លោកឡាក់ ហឿន, ៣-លោក អ៊ីវ ឈីន, ៤-លោក និន សុក្រាវ៉ាន់, ៥-លោក ស្វាយ គូញ, ៦-លោកស្រី តាន់ សុធារ៉ា, ៧-លោក ព្រាប វុធ, ៨-លោក ប្រាក់ ឃុនដារ៉ា, ៩-អ្នកស្រី នៃ តុលា, ១០-លោកស្រី និង សុផានារី, ១១-លោក ងិន ង៉ាន់។
ពលរដ្ឋម្នាក់តំណាងឱ្យប្រជាពលរដ្ឋ ១១គ្រួសារ បានឱ្យដឹងថា ប្រជាពលរដ្ឋចំនួន ១១គ្រួសារបានកាន់កាប់ដីចម្ការនិងបានអាស្រ័យផលជាយូរឆ្នាំមកហើយ គ្រួសារខ្លះតាំងពីឆ្នាំ១៩៩១ និងគ្រួសារខ្លះទៀតចាប់ពីឆ្នាំ១៩៩៣ រហូតមក។ ទើបមកដល់ឆ្នាំ២០០៧ ត្រូវបានមន្ត្រីបរិស្ថានបានហាមឃាត់ពួកគាត់ ព្រមទាំងបានកាប់បំផ្លាញដំណាំរបស់ពួកគាត់ដូចជាស្វាយ ចេក ធុរេន ដើមទឹកដោះគោ ជាដើមនៅលើផ្ទៃដីទំហំប្រមាណជាង ២០ហិកតា ដែលទំហំដីគឺចាប់ពីផ្លូវចូលភ្នំបូកគោរហូតដល់តំបន់វាលពួច។
ពលរដ្ឋដដែលបានបន្តថា ពួកគាត់បានកាន់កាប់ដីនេះជាយូរមកហើយមានទាំងឯកសារកាន់កាប់ សាលាកបត្រព័ត៌មានរបស់ក្រុមនិស្សិតចុះវាស់វែង និងឯកសារចាប់ពីថ្នាក់ភូមិឃុំស្រុករហូតដល់ថ្នាក់ខេត្ត តែត្រូវបានក្រុមហ៊ុន សុខា អូតែល និងមន្ត្រីបរិស្ថានខេត្តបានឃុបឃិតគ្នារំកិលព្រំប្រទល់ឈានមករំលោភបំពានយកដីចម្ការរបស់ពួកគាត់ដែលធ្លាប់អាស្រ័យផលរាប់ទសវត្សរ៍មកហើយ។
យោងតាមពាក្យបណ្តឹងរបស់ប្រជាពលរដ្ឋ ១១គ្រួសារ នៅភូមិកែបថ្មី ឃុំបឹងទូក ស្រុកទឹកឈូ ចុះថ្ងៃចន្ទ ៨រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៣ ខែកញ្ញា ឆ្នាំ២០១៨ គោរពជូន ឯកឧត្តមអភិបាល នៃគណៈអភិបាលខេត្តកំពត សំណើសុំប្តឹងក្រុមហ៊ុន សុខា អូតែល ដែលបានឈូសឆាយរំលោភយកដីចម្ការដែលពួកគាត់អាស្រ័យផលនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត។
ក្នុងលិខិតដដែលបានឱ្យដឹងបន្តថា ដោយមូលហេតុ ក្រុមហ៊ុន សុខា អូតែល បានប្រើគ្រឿងចក្រមកឈូសឆាយផលដំណាំរបស់ពួកគាត់ (ពលរដ្ឋ១១គ្រួសារ) ដែលកំពុងអាស្រ័យផលនៅលើដីនោះ មានដំណាំដូចជា ស្វាយ ស្វាយចន្ទី ខ្នុរ ចេក ទឹកដោះគោ ត្របែក ដូង ត្រូវបានកម្ទេចចោលអស់រួចក្រុមហ៊ុនបានយកដីរបស់ពួកគាត់ដាំស្វាយ ត្របែក ក្រូច ដាំលើដីដែលបានឈូសឆាយនោះ ដើម្បីបំបាត់ភស្តុតាងដំណាំដែលពួកគាត់បានដាំដុះនាពេលកន្លងមក។
សូមបញ្ជាក់ថា ដីចម្ការរបស់ប្រជាពលរដ្ឋទាំង ១១គ្រួសារ ពួកគាត់បានកាន់កាប់អាស្រ័យផលដាំដុះ តាំងពីឆ្នាំ១៩៩០-១៩៩១ មកម្ល៉េះ ហើយមានទាំងសាលាកបត្រព័ត៌មាន (បង្កាន់ដៃ) របស់និស្សិតបានធ្វើការវាស់វែងរួចរាល់ផងដែរ។
លោក ផែ លាក់ នាយកចាត់ការទូទៅខាងវិស័យកសិកម្ម នៃក្រុមហ៊ុន សុខា អូតែល (SOKHA HOTEL CO.,LTD) បានឱ្យដឹងយ៉ាងខ្លីថា រឿងទំនាស់ដីធ្លីនៅតំបន់ឧទ្យានជាតិព្រះមុនីវង្ស “បូកគោ” នេះមិនមានពាក់ព័ន្ធជាមួយនឹងក្រុមហ៊ុននោះទេ គឺទាក់ទងជាមួយនឹងមន្ទីរបរិស្ថានខេត្តកំពត។
ទាក់ទិននឹងការចោទប្រកាន់ខាងលើនេះដែរ លោក ស៊ុយ ធា ប្រធានមន្ទីរបរិស្ថានខេត្តកំពត បានឱ្យដឹងថា ករណីរំកិលព្រំសូមកុំយកឈ្មោះមន្ត្រីបរិស្ថានថាជាអ្នករំកិលព្រំ គឺមិនអាចកើតឡើងនោះទេ ព្រោះបង្គោលព្រំប្រទល់មាននិយាមការច្បាស់លាស់។ តែប្រសិនបើដឹងច្បាស់ សូមប្រាប់ឈ្មោះមន្ត្រីបរិស្ថានរូបណាហ៊ានរំកិលព្រំ។ តួនាទីរបស់មន្ត្រីបរិស្ថានគឺអនុវត្តតាមច្បាប់គោលការណ៍ណែនាំរបស់ថ្នាក់លើស្របតាមច្បាប់។ សូមឱ្យប្រជាជនប្រាប់ឈ្មោះអ្នករំកិលព្រំ ពីព្រោះកុំឱ្យបង្ខូចឈ្មោះស្ថាប័នរបស់លោក។ រីឯ បណ្តឹងរបស់ប្រជាពលរដ្ឋទាំង ១១គ្រួសារ លោកមិនទាន់បានដឹងរឿងនេះនោះទេ តែចំពោះដីរបស់ប្រជាពលរដ្ឋដែលកាន់កាប់អាស្រ័យផលគឺយើងត្រូវការពារផលប្រយោជន៍របស់ប្រជាពលរដ្ឋ ក្នុងនាមលោកជាអ្នកអនុវត្តច្បាប់ទៅតាមលិខិតបទដ្ឋាន។
លោក ស៊ុយ ធា បានបន្តថា កន្លងទៅពេលក្រុមហ៊ុនឈូសឆាយខ្ញុំបានសុំឱ្យគាត់ដាក់ពាក្យមក តើនៅកន្លែងណា? ទីតាំងណា? ចឹងយើងដោះស្រាយបន្តទៀត បើសិនជាគាត់ពិតជាមានដំណាំជាក់ស្តែងមែន អាហ្នឹង! រដ្ឋបាលខេត្តលោកនឹងធ្វើការជាមួយក្រុមហ៊ុន ជាមួយក្រសួងបរិស្ថានដើម្បីយើងពិនិត្យឱ្យមានភាពសុក្រឹតទាំងអស់គ្នា យើងមិនអាចបោះបង់ចោលប្រជាពលរដ្ឋដែលកាន់កាប់ជាក់ស្តែងទៅតាមគោលនយោបាយរបស់រាជរដ្ឋាភិបាលវាស់វែងដីជូនប្រជាពលរដ្ឋទេ ៕
