ក្រុងប៉ោយប៉ែត-ដោយ: លាង សុភ័ក្ត្រ
នៅព្រឹកថ្ងៃសុក្រ ១៤រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹង ថ្ងៃទី០៣ ខែឧសភា ឆ្នាំ២០១៩នេះ
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំក្រុមការងាររដ្ឋបាលក្រុង និងក្រុមការងាររដ្ឋបាលសង្កាត់នាំយករថយន្តបូមធូលី និងលាងសម្អាតផ្លូវចុះបូមធូលី បាញ់ទឹកលាងសម្អាត និងធ្វើអនាម័យតាមដងផ្លូវជាតិលេខ៥ រហូតដល់លើស្ពានមិត្តភាពកម្ពុជា-ថៃ (ក្បាលស្ពាន) ច្រកទ្វារព្រំដែនអន្តរជាតិប៉ោយប៉ែត និងតាមដងផ្លូវមួយចំនួនទៀតក្នុងមូលដ្ឋាន។
ក្នុងសកម្មភាពនាំយករថយន្តជាច្រើនគ្រឿងចុះបូមធូលី បាញ់ទឹក លាងសម្អាតផ្លូវ និងធ្វើអនាម័យបរិស្ថានតាមដងផ្លូវនាព្រឹកនេះ មានវត្តមានអញ្ជើញចូលរួមពីៈ
១-លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត
២-លោកវរសេនីយ៍ឯក ខឹម ចិត្ត្រា នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត
៣-លោក អ៊ុយ ច័ន្ទរិទ្ធ សមាជិកក្រុមប្រឹក្សាក្រុង និងជាប្រធានក្រុមការងារយុវជនគណបក្សប្រជាជនក្រុងប៉ោយប៉ែត
៤-លោក សុខ ពេញណន ប្រធានការិយាល័យអភិវឌ្ឍន៍ក្រុង នៃរដ្ឋបាលក្រុងប៉ោយប៉ែត
៥-លោក ភោគ លន ចៅសង្កាត់ នៃសង្កាត់ប៉ោយប៉ែត
៦-លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត
៧-ក្រុមការងារក្រុមហ៊ុន ខ្មែរ ប៊ែវើរីជីស ខូអិលធីឌី
៨-កម្លាំងនគរបាល នៃអធិការដ្ឋាននគរបាលក្រុងប៉ោយប៉ែត
៩-មន្ត្រីការិយាល័យបរិស្ថានក្រុងប៉ោយប៉ែត
១០-ក្រុមការងារយុវជនគណបក្សប្រជាជនក្រុងប៉ោយប៉ែត
១១-ក្រុមការងារក្រុមហ៊ុន ស៊ីនទ្រី (CINTRI) សាខាក្រុងប៉ោយប៉ែត
១២-រួមនឹងលោក លោកស្រីជាមន្ត្រីរដ្ឋបាលក្រុង លោក លោកស្រីជាចៅសង្កាត់រង លោក លោកស្រីជាមេភូមិ-អនុភូមិ ព្រមទាំងកម្លាំងប្រជាការពារទាំងពីរសង្កាត់ (សង្កាត់ប៉ោយប៉ែត និងសង្កាត់ផ្សារកណ្តាល) បានចូលរួមយ៉ាងសកម្ម និងមានទឹកមុខប្រកបដោយក្តីរីករាយ និងស្នាមញញឹមក្នុងអត្ថន័យភាតរភាពបំផុត។
សូមជម្រាបថា រថយន្តបូមធូលី និងលាងសម្អាតផ្លូវ រួមនឹងរថយន្តបាញ់ទឹកជាច្រើនគ្រឿងបានមកពីការចូលរួមពី រថយន្តបាញ់ទឹកជាកម្មសិទ្ធិផ្ទាល់ខ្លួនរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងរថយន្តបូមធូលី និងលាងសម្អាតផ្លូវរបស់រដ្ឋបាលក្រុងប៉ោយប៉ែត ឧបត្ថម្ភដោយ ពាណិជ្ជករ អាជីវករ ក្រុងប៉ោយប៉ែត រួមនឹងរថយន្តបូមធូលី និងលាងសម្អាតផ្លូវ របស់ក្រុមហ៊ុន ខ្មែរ ប៊ែវើរីជីស ខូអិលធីឌី ចំនួន ២គ្រឿង មកពីរាជធានីភ្នំពេញផងដែរ។
គ្រប់សកម្មភាពបម្រើប្រជាពលរដ្ឋទាំងអស់នេះ សរបញ្ជាក់ឱ្យឃើញពីការយកចិត្តទុកដាក់ និងស្មារតីប្រកបដោយការទទួលខុសត្រូវខ្ពស់របស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ចំពោះការរស់នៅរបស់បងប្អូនប្រជាពលរដ្ឋ ប្រកបដោយភាពសុខដុមរមនា ផាសុកភាព អនាម័យបរិស្ថាន និងសោភ័ណភាពក្រុង។ ទន្ទឹមនឹងនេះ លោក គាត ហ៊ុល គឺជាថ្នាក់ដឹកនាំម្នាក់ដែលប្រជាពលរដ្ឋក្រុងប៉ោយប៉ែតមិនអាចខ្វះបាន ដោយរូបលោកបានចូលរួមចំណែកយ៉ាងសកម្មជាមួយកិច្ចការកសាង អភវឌ្ឍន៍ សេដ្ឋកិច្ច មនុស្សធម៌ ចំណងមិត្តភាព និងកិច្ចសហប្រតិបត្តិការ រួមនឹងការពង្រឹងសន្តិសុខ សណ្តាប់ធ្នាប់សាធារណៈដោយមិនគិតពីការនឿយហត់ និងការចំណាយថវិកាផ្ទាល់ខ្លួនមានចំនួនដ៏ច្រើនលើសលប់ម្តងណាឡើយ។ //
