ក្រុងប៉ោយប៉ែត-ដោយ: លាង សុភ័ក្ត្រ
នៅព្រឹកថ្ងៃចន្ទ ៣រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី១៦ ខែកញ្ញា ឆ្នាំ២០១៩ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអញ្ជើញជាអធិបតីក្នុងពិធីប្រគល់ថវិកាលើកទឹកចិត្ត និងគ្រឿងឧបភោគនិងបរិភោគដល់កម្លាំងប្រជាការពារ និងក្រុមការងារយុវជនភូមិអូរឫស្សី ស្ថិតក្នុងសង្កាត់ផ្សារកណ្តាល ក្នុងឱកាសពិធីបុណ្យកាន់បិណ្ឌ (ដាក់បិណ្ឌ) និងបុណ្យភ្ជុំបិណ្ឌនាពេលដ៏ខ្លីខាងមុខនេះ។
ពិធីនេះបានរៀបចំឡើងនៅទីស្នាក់ការភូមិអូរឫស្សី ដោយមានវត្តមានអមដំណើរគណៈអធិបតី និងអញ្ជើញចូលរួមពីសំណាក់លោក ញឹម ផឿង នាយករដ្ឋបាលសាលាក្រុងប៉ោយប៉ែត លោក ស្រិល អិុន ប្រធានក្រុមប្រឹក្សាសង្កាត់ និងជាចៅសង្កាត់ នៃសង្កាត់ផ្សារកណ្ដាល លោក វ៉ាន់ ប៊ុនធី អនុប្រធានអង្គភាពលទ្ធកម្មក្រុង លោក ស៊ូ បាន មន្ត្រីការិយាល័យអភិវឌ្ឍន៍ក្រុង និងលោក សាំង ឃឺន មេភូមិអូរឫស្សី រួមនឹងកម្លាំងប្រជាការពារ និងក្រុមការងារយុវជនភូមិអូរឫស្សីជាច្រើននាក់។
កម្លាំងប្រជាការពារភូមិចំនួន ៤២នាក់ និងក្រុមការងារយុវជនភូមិអូរឫស្សីចំនួន ៥នាក់ សុរុប ៤៧នាក់ បានទទួលការលើកទឹកចិត្តពីអាជ្ញាធរក្រុង-សង្កាត់ និងមេភូមិ ជាថវិកា និងគ្រឿងឧបភោគនិងបរិភោគ ដោយក្នុងម្នាក់ទទួលបាន ÷
១-ថវិកា ចំនួន ១៥០,០០០ (មួយសែនប្រាំម៉ឺន) រៀល
២-អង្ករខ្សាយមួយបាវ ទម្ងន់ ៥០គីឡូក្រាម
៣-មី ១កេស
៤-ទឹកក្រូច ១យួរ
សូមជម្រាបថា ពិធីប្រគល់ថវិកាលើកទឹកចិត្ត និងគ្រឿងឧបភោគនិងបរិភោគដល់កម្លាំងប្រជាការពារ និងក្រុមការងារយុវជនភូមិអូរឫស្សីនាឱកាសពិធីបុណ្យកាន់បិណ្ឌ (ដាក់បិណ្ឌ) នេះគឺដោយបានការយកចិត្តទុកដាក់ និងចំណាយថវិកាផ្ទាល់ខ្លួនរបស់លោក សាំង ឃឺន មេភូមិអូរឫស្សី រួមនឹងសប្បុរសជន និងតាមការចង្អុលបង្ហាញពីលោក ស្រិល អិុន ប្រធានក្រុមប្រឹក្សាសង្កាត់ និងជាចៅសង្កាត់ នៃសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
សូមរម្លឹកថា កាលពីរសៀលថ្ងៃសុក្រ ១៥កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី១៣ ខែកញ្ញា ឆ្នាំ២០១៩កន្លងទៅ លោក ស្រិល អិុន ប្រធានក្រុមប្រឹក្សាសង្កាត់ និងជាចៅសង្កាត់ នៃសង្កាត់ផ្សារកណ្ដាល សហការជាមួយលោក សាំង ឃឺន មេភូមិអូរឫស្សី ព្រមទាំងក្រុមការងារយុវជនបានរំលែកនូវទឹកចិត្តដោយចំណាយថវិកាផ្ទាល់ខ្លួនរៀបចំពិធីប្រគល់ថវិកា និងគ្រឿងឧបភោគនិងបរិភោគ ដើម្បីលើកទឹកចិត្តចំពោះកិច្ចខិតខំប្រឹងប្រែងទាំងថ្ងៃទាំងយប់របស់កម្លាំងប្រជាការពារភូមិអូរឫស្សី ចំនួន ១៣នាក់។ ក្នុងនោះលោក ស្រិល អិុន ចៅសង្កាត់ផ្សារកណ្ដាល បានឧបត្ថម្ភថវិកាចំនួន ១,២០០,០០០ (មួយលានពីរសែន) រៀល និងលោក សាំង ឃឺន មេភូមិអូរឫស្សី បានឧបត្ថម្ភអង្ករខ្សាយ ចំនួន ១២បាវ ទម្ងន់ ៦០០គីឡូក្រាម មី ១២កេស និងភេសជ្ជៈមួយចំនួនផងដែរ។
សូមបញ្ជាក់ថា ប្រជាការពារ គឺកម្លាំងការពារសន្តិសុខស្ម័គ្រចិត្តនៅថ្នាក់មូលដ្ឋាន ដែលបំពេញការងារដើម្បីសុវត្ថិភាព សន្តិសុខជូនប្រជាពលរដ្ឋ។ ប្រជាការពារគឺជាកម្លាំងដ៏សំខាន់មួយក្នុងការជួយការងារដល់កម្លាំងនគរបាលប៉ុស្តិ៍រដ្ឋបាល បើទោះបីជាកម្លាំងទាំងនោះគ្មានអាវុធ គ្មានក្របខ័ណ្ឌ និងគ្មានប្រាក់បៀវត្ស ប៉ុន្តែពួកគាត់បានស្ម័គ្រចិត្តចូលការពារមូលដ្ឋាន។ កម្លាំងប្រជាការពារត្រូវបំពេញតួនាទីរបស់ខ្លួនដូចជា ៖
១-ប្រជាការពារគឺជាសេនាធិការរបស់ប៉ុស្តិ៍រដ្ឋបាលនគរបាលឃុំ-សង្កាត់ បានចូលបម្រើការងារដោយស្ម័គ្រចិត្ត សហការជាមួយកងកម្លាំងនគរបាល អាវុធហត្ថ និងអាជ្ញាធរដែនដីគ្រប់លំដាប់ថ្នាក់ ពិសេសបម្រើប្រជាពលរដ្ឋឱ្យបានល្អ ពេលមានករណីបទល្មើសផ្សេងៗកើតមានឡើង ប្រជាការពារត្រូវចុះទៅដល់ភ្លាមដើម្បីទប់ស្កាត់រួចរាយការណ៍ ឬចាប់ខ្លួនប្រគល់ឱ្យសមត្ថកិច្ច។
២-ប្រជាការពារគឺនៅជាប់ជាមួយប្រជាពលរដ្ឋជាប្រចាំ ជួយដាស់តឿន អប់រំដល់ប្រជាពលរដ្ឋពីបញ្ហាផ្សេងៗ ពិសេសអប់រំដល់យុវជនឱ្យនៅឆ្ងាយពីគ្រឿងញៀន។
៣-ប្រជាការពារត្រូវក្តាប់ឱ្យបានពីមុខសញ្ញាណាដែលបានកើតឡើងញឹកញាប់ជាងគេកន្លងមក ឬមុខសញ្ញាណាបម្រុងកើតមានឡើងត្រូវទប់ស្កាត់ឱ្យបានទាន់ពេលវេលា៕
