រាជធានីភ្នំពេញ-ដោយ: សុភ័ក្ត្រ
រាជរដ្ឋាភិបាលកម្ពុជាសម្រេចបង្កើតខណ្ឌបឹងកេងកង នៃរាជធានីភ្នំពេញ ដោយកាត់យកសង្កាត់ចំនួន០៧ ពីខណ្ឌចំការមន នៃរាជធានីភ្នំពេញគឺ ÷
១- សង្កាត់បឹងកេងកងទី១
២- សង្កាត់បឹងកេងកងទី២
៣- សង្កាត់បឹងកេងកងទី៣
៤- សង្កាត់អូឡាំពិច
៥- សង្កាត់ទំនប់ទឹក
៦- សង្កាត់ទួលស្វាយព្រៃទី១ និង
៧- សង្កាត់ទួលស្វាយព្រៃទី២
នេះបើយោងតាមអនុក្រឹត្យរបស់រាជរដ្ឋាភិបាលកម្ពុជា លេខ ០៣ អនក្រ.បក ចុះថ្ងៃអង្គារ ៣កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៨ ខែមករា ឆ្នាំ២០១៩។
ក្នុងអនុក្រឹត្យខាងលើ នៅក្នុងមាត្រា ២ បានបញ្ជាក់បន្ថែមថា ត្រូវបានផ្ទេរទីតាំងសាលាខណ្ឌចំការមនដែលស្ថិតក្នុងសង្កាត់បឹងកេងកងទី៣ ទៅឱ្យសាលាខណ្ឌបឹងកេងកង។ ចំណែកឯ ទីតាំងសាលាខណ្ឌចំការមន ត្រូវស្ថិតនៅក្នុងសង្កាត់ទន្លេបាសាក់វិញ។ ជាមួយគ្នានេះ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលខណ្ឌបឹងកេងកង ត្រូវអនុលោមទៅតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។
សូមបញ្ជាក់ថា ក្រៅពីបង្កើតខណ្ឌបឹងកេងកង រាជរដ្ឋាភិបាលកម្ពុជាបានបង្កើតខណ្ឌថ្មីមួយទៀតគឺខណ្ឌកំបូល ដោយកាត់យកសង្កាត់ចំនួន០៦ ពីខណ្ឌពោធិ៍សែនជ័យ និងកាត់យក ១សង្កាត់ ពីខណ្ឌដង្កោ នៃរាជធានីភ្នំពេញ ដោយខណ្ឌកំបូល មានសង្កាត់ចំនួន០៧ គឺ ÷
១- សង្កាត់កំបូល
២- សង្កាត់កន្ទោក
៣- សង្កាត់ឪឡោក
៤- សង្កាត់ស្នោរ
៥- សង្កាត់ភ្លើងឆេះរទេះ
៦- សង្កាត់បឹងធំ និង
៧- សង្កាត់ប្រទះឡាង
បច្ចុប្បន្ននេះ រដ្ឋបាលរាជធានីភ្នំពេញ មានខណ្ឌសរុបចំនួន១៤ គឺ ÷
១- ខណ្ឌព្រែកព្នៅ
២- ខណ្ឌជ្រោយចង្វារ
៣- ខណ្ឌសែនសុខ
៤- ខណ្ឌមានជ័យ
៥- ខណ្ឌឫស្សីកែវ
៦- ខណ្ឌ៧មករា
៧- ខណ្ឌច្បារអំពៅ
៨- ខណ្ឌទួលគោក
៩- ខណ្ឌដូនពេញ
១០- ខណ្ឌចំការមន
១១- ខណ្ឌពោធិ៍សែនជ័យ
១២- ខណ្ឌដង្កោ
១៣- ខណ្ឌបឹងកេងកង
១៤- ខណ្ឌកំបូល
